КІТАПХАНА ТҮНІ - 2016
2016 жылдың 29 мамыр күні «Приозерск қалалық кітапханасы» коммуналдық мемлекеттік мекемесінде «Кітапхана түні - 2016» акциясы ұйымдастырылды. «Кітапхана түні» мәдени –әлеуметтік акциясының мақсаты: қала жұртшылығын кітап құмарлыққа баулу, оқуды дәріптеу, қала тұрғындарының бос уақытын тиімді өткізуіне атсалысу, кітапханамен қоғамның арасындағы байланысты нығайту. Акция №1 мектеп оқушыларының орындауындағы « Қарғаның мұңы» деп аталатын ертегі қойылымымен ашылды. Кеш барысында оқырмандар караокемен ән шырқап, кешіміз өнерлі клуб мүшелерінің өлең -жырларымен өз жалғасын тапты.
«Оқырман жемісі- кітапхана жеңісі» демекші біз әрқашанда өзіміздің өнерлі оқырмандарымызды мақтан тұтамыз. Халқымыз өнер мен білімді қадірлеген. Бүгінгі таңда барлық адамзат алдында тұрған басты мақсат-білімді ұрпақ тәрбиелеу. Осындай білімді де алғыр, көркіне ақылы сай парасатты оқырмандарымыздың арасында ақынжанды ұл-қыздарымыздан құрылған көркемсөз шеберлері «Жас толқын» жас ақындар клубының мүшелері, сонымен қоса оқырмандарға қызмет ету бөлімінде зейнеткерлер мен ардагерлерден құрылған «Сырлас» клубының мүшелері өнерден шашу шашты. Биылғы жыл өзіндік ерекшеліктерімен есте қалары сөзсіз. Себебі биылғы жылы тарихымызда үлкен қоғамдық- саяси мәні бар «Желтоқсан құрбандарына -30жыл» толса, ҚР Тәуелсіздігіне –25 жыл толып отыр. Ал, Қарағанды облысы биыл 80 жылдығын тойласа, қаламыз – 60 жылдық мерейтойын тойламақшы. Осы бір даталы мерекелерге орай әр кітапханашы өз бөлімшесінде тақырыптық көрмелер және де «Табиғатты аялайық» атты қол - өнер көрмесі ұйымдастырылды. Келген қонақтарымызға кітапхананың түнгі әлеміне саяхаттау барысында кітап көрмелерімен таныстырылды. Қол - өнер көрмесінде тозығы жеткен кітаптардан журнал оқып отырған адам бейнесі және де табиғатқа байланысты қолдан әр түрлі бейнелер жасалынып көрермендер назарына ұсынылды.. Міне осындай атаулы мерекелердің тоғысқан жылында оқырмандарға қызмет ету бөлімінде зейнеткерлер мен ардагерлерден құрылған «Сырласу» клубына 1 жыл және қазақ халқының салт-дәстүрін, әдет-ғұрпын насихаттайтын «Атамұра» қоғамдық бірлестігінің құрылғанына да 5 жыл. Мерекелік дастархан жайылып, қонақтарға тәтті – дәмділер ұсынылды. Кештің соңында отты әуе шарын ұшыру кітапхананың ең белсенді оқырманына тапсырылды. Концерттік бағдарламамызға қала тұрғындары белсене қатысып, кітапханада оқырмандар қатары жаңа оқырмандармен толықты.
